رێگا کوردستان -بەشی بین الملل
بەراپورتی رێگا کوردستان، عەمید سەرحەد قادر فەرماندەی پۆلیسی قەزاو ناحییەکان لە پارێزگای کەرکوک بەرێگا کوردستان رایگەیاند، ئەمڕۆ دوو شەممە، دوو ئەندامی رێکخراوی داعش کە دانیشتووی پارێزگای نەینەوان و لەگەڵ ئاوارەکان هاتبوونە شاری کەرکوک، دەستگیرکران، ئاماژەی بە بەشداریی ئەو دوو داعشە کرد لە زۆربەی شەڕەکان و باسی برینداربوونی یەکێک لە دەستگیرکراوەکانیشی کرد لە هێرشێکی ئاسمانیدا کە بە وتەی ئەو پێشتر لە نەخۆشخانەکانی نەینەوا چارەسەری بۆ کراوە.
بە وتەی عەمید سەرحەد، هێزێکی سەر بە پۆلیسی قەزا و ناحییەکان، ئەمڕۆ پرۆسەیەکی ئەمنییان ئەنجامدا و توانیان دوو کەس بەپێی ماددەی ۴ی تیرۆر دەستگیر بکەن کە دانیشتووی گوندی قەراجی سەر بە پارێزگای نەینەوان، رونیشکردەوە، لەکاتی ئەنجامدانی پرۆسەکەدا پشتییان بە زانیاریی هەواڵگری ورد بەستووە کە بووەتە مایەی دەستگیرکردنیان.
فەرماندەی پۆلیسی قەزا و ناحییەکانی کەرکوک وتیشی: “ئەو دوو داواکراوە، لە ریزەکانی داعشدا بوون و چەندان هێرشییان لە دژی هێزە ئەمنییەکان ئەنجامداوە و بەشدارییان لە شەڕەکانی دژ بە هێزەکانی پێشمەرگە و حەشدی شەعبی کردووە، ئاماژەی بەوەشکرد کە یەکێک لە دەستگیرکراوەکان دانی بەوەداناوە کە لە یەکێک لە هێرشە ئاسمانییەکان لەکاتی هێرشێکدا لە میحوەری کەرکوک برینداربووەو دواتر بۆ مەبەستی چارەسەر بۆ شاری موسڵ گواستراوەتەوە و لەلایەن پزیشکەکانی داعشەوە چارەسەری بۆکراوە.
عەمید سەرحەد قادر فەرماندەی پۆلیسی قەزاو ناحییەکان لە پارێزگای کەرکوک، لە ۱۰ ئەیلولی رابردوو، لەبەریەکهەڵوەشاندنەوەی تۆڕێکی سەر بە رێکخراوی داعشی راگەیاند کە ئەرکی ئەنجامدانی ئاسانکاریی بووە بۆ جێبەجێکردنی کاریی خۆکوژی (اشبال الخلافە” و پێشکەشکردنی کۆمەکی دارایی بۆ چەکدارانی رێکخراوەکە.
