تاریخ انتشار : ۱۹ فروردین ۱۳۹۶
ریگا کوردستان – بەش کوومەڵایەتی
نەورووز ئەژ #موغوڵستان تا #باڵکان جەشنە مەگیررێ، ئایا نەورووز ئی ملەتەلە، ڤەگەر ئی مەعنا ئیمە مەفەمرێ؟
ئایا خڵات گرتن ساڵ تازه میلادی ڤە #کورە هەر مەعنا #بابانووئڵ – ئسکاندیناڤی درێ؟ ئێرەلەسە ک رووح ملی و منتالیتە گشتی ئفتراق ئەێ لا تەشابوهەلە مەخوڵقنێ.
تاهر تەوفیق هونەرمەند پیرێ بی ک نە باوەڕ #سیاسی دیاریێ داشتێ و نەیش عەڵاقەێ ڤە سیاسەت، بڵەم ڤە حوکم قانوون بەعس هەر ساڵ س رووژ ڤەرج ئەژ نەورووز دەسگیرە مەیا و پەنج رووژ دوما نەورووز ئازادە مەیا!
تاهر چاواشە تەزەکورەل فرە و چەن گل کوتەک هواردن، #نمەتونستێ هەنێ ک ئەژ چایخانەێ ک پاتوق بیتێ، مەپلیاوە ئەڕا ماڵ” #ئەم-رووژی-نەورووزی-ساڵی-تازە” نەچڕێ، ئەۆ ”نەورووزە” مەخوەنێ، جوانەلیش ڤەگەرێ مەخوەنان، جوانەل هامخانیانە مەکرد و هەنێ مەڕەسیانە #خوێنی-لاوەکان” خوێن گشتانە مهاتە جووش و ئاگر گیان جوانەل شەێرە مەگوڕانێ، ئاگرە مەکەتە گیان بەعس و خوێن جوانەل #لیسک ئازادی سوێرتررا مەکردێ.
گشت تورکەل ڤە نەورووزێرە باقلەواو شیرینیە مەرن و هەتایش نەورووزان هوەرانۊیە #باڵکان و #قەفقازیش، ئەڤانە ڤڕ و گیژ ئەژ فەهم نەورووز کورد، رز گولاونە مەگرت ئەرن.
ئەڤانە نەفەمیا ئەژ گیان ئاگر، ئاگرانە مەڤەستە ئاگرا!
ورەلە #ئامد بی، گیانێ نەورووز ئازادی و ئاگر بی، نە #سفرەو #سەمەنوو و #سین و #شین و #باقلەواو!
ئیمە گیان نەورووزیمن یا نەورووز گیان ئیمە؟
ئیمە جوور موغوڵەل نیمن ک ئەڤەمانە ئەژ سەۆقات خارەتێ ئاوردۊیە ڤڵات وژمان.
نەورووز ڤە ڤڵات ئیمێرە سەۆزە مەکەێ.
ئیمە پشتمان ناسەر تەکاون گەرمێ ک مووسیقی نەورووز، ئارد سرینجک ئەژ گەلۊمان بەێرێیە هوار!
هورد مووسیقی نەورووزمان بوێیە.
دوێڵێکە ک بەن دڵە مەۆڕێ!
سوڕناێکە ک بێ دەنگییە مەشکنێ!
هەڵپەرکەێکە ک دڵ تەمەڵ زمسان گەرمرا #مەکەێ.
نەورووز ئازادی
نەورووز ئەژ کووورا هات؟
نەورووز ڤە یێ جا تەقڤیمە و ڤە جاێکیشێر تاریخ، بڵەم نەورووز ئەژ بین هات، ئەژ سروشت، ورەلە ک تکرار شەکەتی نمەگرێئەۆر و هەر گلیش رەنگێن ترە.
نەورووز سرگ جاڤدانگییە ک ڤە ڤەر چەم کورد #دوونادوونە مەکەێ.
ئێرەلەسە ک سەرپەنجە چۊزە دار، دەسە مارێیە ڤهاررا.
ئێرەلە ک یەکومێن #هڵاڵە-برم ئەژ شەرم رەنگێنی خەجاڵەتا ماو.
ئێرەلە ک ڤا گشت پەن پێشێنییەلە مارێیە گووش کویەلرا.
ئێرەلە ک نەورووز پڕ ئەژ دەنگ و بوو، سوار ئەر ڤایە!
گشت هێزەلێ ک تەبیعەتە ماوجنە تەولید و ڤەدی هاتن، هەر ئەڤانەنە ک دوون تازه رووح ئیمە ڤەگەر ئاگر ڤەسڤەسە مەکەن.
رووحە مووشێیە ئیمە:
#مەرگ مەعنا نەێرێ
#ژیاێن دیل نماو
ئارزووەلێ ک ڤە ئێرە هانە ژێر خاکەێرە، گشت گوڵە مێیەن
پووسەل و کەڤەڵەل گشتان دوما بزگە، مەشکن
هەرکێ ک فکرە مەکەێ هامبەش نەورووز ئیمەیە!
بایەد گشت دارەل ڤڵاتێ رازی بکەێ ک ڤە #ئازار گوڵ بێیەن.
بایەد کوێ ڤادار بکەێ ک ڤە #ئازار قوڵنج بشکنی.
بایەد قەۆڵ ئەژ رووەلێ بگرێ ک ڤە #ئازار نارینە بخوەنن.
بایەد هەڵپەرکە نیشان ڤا بەێ ک ڤە #٢١ ئازارەێرە چووپی بگرێ!
ئەنی سفرە دۊرانن ئاسانەو و هەر گیاندارێ شیرینی هواردنە مەزانێ!
ئیمرووژ #سەیمرە گوورانییە مەچڕێ، ئیمرووژ #قەزڤێنە قوڵنج یەخێ شکانەێسێ، ئیمرووژ #بەلۊیەل گشت دەسە سێنە ڤان و ڤا #چووپیە مەکیشێ.
نەورووز -ئازادیە.
مسەفا باقری‌ئاشنا – دەبیر بەش کوومەڵایەتی
